داخلا نمبر	1508
عنوان	الانا جي
شاخ	شاعر
پڙهيو ويو	1833 ڀيرا
داخلا جو حوالو	انسائيڪلوپيڊيا سنڌيانا جلد پهريون

نامور دانشور جي. الانا

الانا جي

الانا ، جِي: ناميارو شاعر، محقق ۽ تحريڪ پاڪستان جو ممتاز جِي .الانا ، 22 جون 1906ع تي ڪراچيءَ ۾ پيدا ٿيو . سندس پورو نالو غلام علي الانا هو . سينٽ پيٽرڪس هاءِ اسڪول ڪراچيءَ مان مئٽرڪ ڪرڻ کان پوءِ ، وڌيڪ تعليم لاءِ ڊي . جي سنڌ ڪاليج ڪراچيءَ ۽ فرگوسن ڪاليج پوني ( ڀارت ) ۾ پڙهيو . شاگرديءَ واري زماني ۾ ، تحريڪ پاڪستان ۾ سرگرميءَ سان حصو وٺڻ شروع ڪيائين . 20 سالن تائين ڪراچي ميونسپل ڪارپوريشن جو ميمبر چونڊيو رهيو ، 1968ع ۾ ڪراچي ڪارپوريشن جو ميئر مقرر ٿيو ، جنهن کان پوءِ ، ڇهن سالن تائين اسلامي چيمبر آف ڪامرس جو صدر پڻ رهيو . تقريباً 120 بين الاقوامي ڪانفرنسن ۾ پاڪستان جي نمائندگي ڪيائين ۽ ڪجهه وقت گڏيل قومن جي انساني حقن واري ڪميشن ۾ پاڪستان جو چيئرمئن پڻ رهيو . آغاخان فيڊرل ڪائونسل فار پاڪستان جو سالن تائين صدر رهيو . سندس گهر واري مسز جينوما الانا ، سنڌ اسيمبليءَ جي ميمبر ۽ پارليامينٽري سيڪريٽري رهي . جي . الانا جي شاعريءَ جو اردو ، بنگالي ، گجراتي ۽ انگريزي ٻولين ۾ ترجمو ٿي چڪو آهي . اردوءَ ۾ لکيل سندس سفرنامو ” ديس بديس “ به شايع ٿي چڪو آهي . سندس ٻين تصنيفن ۾ ” قائداعظم اسٽوري آف نيشن “ ( انگريزي ) ، “ Our Freedom Fighters ” ، ” پاڪستاني شاعري “ ، ” محبت ڪي مشرقي داستانين “ “ Four Classical Poets of Sindh ” ۽ “ Memories of Prince Ali Khan ” شامل آهن . 78 سالن جي ڄمار ۾ 5 مارچ 1984ع تي وفات ڪيائين .